Ташкент сөзі

Сырбай Мәуленов

0
0

Бөлісу:


«Тыңдаңдар, тым-тырыс,
Ташкентте сілкініс.
Қып-қызыл күн шығып,
Қып-қызыл туады ай.
Тоқталған тіршілік,
Бал саны мынадай:
Алғы күн — сегіз,
Кеше — тоғыз,
Қаптады теңіз,
Қаладан жоқ із.
Тыңдаңдар, тым-тырыс,
Ташкентте сілкініс.
Ал бүгін он балл!»
Би-би-си осылай,
Соғады долбар.
«Ал бүгін — он балл!»
Құтырып, құлшынып
Жабады кіл жала:
«Тоқталған тіршілік,
Ташкентте зілзала!
Ташкентте зілзала!»
Ауада зілзала
Ауада атыс.
«Ташкентте зілзала
Ташкентте зілзала!»
Дүрліккен Би-би-си
Дүрліккен Батыс.
Ал Ташкент дүрлікпей,
Табанды алыптай,
Тағдырға илікпей
Тұр қайсар халықтай.
Соғады қайыра,
Күндіз-түні сілкініс.
Ал Ташкент жайына
Жатқан жоқ тым-тырыс.
Ташкентте сілкініс,
Ташкентте күн ыссы.
Жатпайтын тым-тырыс
Ташкент бір жұмысшы.
Тіршілік қаулаған,
Троллейбус үстінде,
Трамвай ішінде,
Тіршілік лаулаған,
Тіршілік қаулаған.
Секілді өр тасқын
Тыңдайды құлақ сап,
Жер үсті жер астын.
Жер асты гүрілдейді
Везувий тауларының оты ұрғандай
Жер асты дірілдейді
Япониядағы шоқ құсқан
шоқылардай.
Бір-бірін ала алмай
Екі күш еңсеріп,
Кереғар қамалдай
Тұр бірге теңселіп.
«Ташкентте сілкініс,
Ташкентте зілзала,
Ташкентте тым-тырыс»—
Өтірік,
бұл жала.
Ташкент бір сұр толқын
Тулаған сыр суы,
Ташкент бір кек жойқын
Құрылыстар дүрсілі,
Кинолар экраны,
Крандар у-шуы.
Поездар зырлаған,
Самолеттер зулаған
«Бәрі де Ташкентке
Бәрі де Ташкентке!»
Дүние Ташкентті тыңдаған.
Ташкент өлген жоқ
Шетел хабарындай,
Ташкент қуатты ракеталар
ұшыратын
Тұр космодром алаңындай.
Ташкенттің сөнген жоқ,
Кеудесінен күн,
Жанарынан ай.
Ташкент бұлаған жоқ
Көзін жаспен.
Ташкент құлаған жоқ,
Қайта биіктей түсті
Ташкент!
Ташкент!
Ташкент!
Сырбай Мәуленов, Сырбай Мауленов, Ташкент, Ташкент сөзі, 0
Біздің ұялы қосымшаларды жүктеңіздер:
Google Play және App Store






GM

Сөзін қосқан

26.08.2016