Әскери әсерлер сөзі

Сырбай Мәуленов

0
0

Бөлісу:


1
Түн күндіздей жап-жарық,
Жерді жуған қызыл қан.
Аспанның ішін ақтарып,
От қанжары сызылған.
Жанып орман өртеніп,
Жатыр өліп жолда аттар.
Дүниені тұр көтеріп
Иығымен солдаттар.
2
Әдемі қыздар — ақ гүлдер
Алыстап кетті қияға.
Жұлдызды түндер, шат күндер
Жып-жылы қалды ұяда.
Тотықұс болып тағы үшып,
Түсіме кірді таң алды.
Ұйықтаған арман талықсып,
Қайтадан күліп оянды.
Жалынын оқтар жайды да,
Бүркеді түтін ай төсін.
Қызғанды менен айды да,
Амалың бар ма қайтесің.
3
Түнді көзбен жөнелтіп,
Таңды көзбен атырып,
Сен келесің мені ертіп,
Шаңқай түске шақырып.
Қанды майдан асуда
Келем оққа ілінбей.
Жебеп мені қасымда
Бірге жүрсің білінбей.
4
Ел айықты дертінен,
Жер айықты өртінен.
Көл толқыды көркімен,
Жел шалқыды еркімен.
Жеңіп шықтық біз ақыр,
Бұраң-бұраң жол жатыр.
Көңіл — сергек, көз —
батыр,
Қимылдады қол батыл.
Төсінде айы тұтылып,
Аппақ жүзін қан басқан.
Кіреукесін сыпырып,
Бір сілкініп алды аспан.
Соғыс жайпап таптаған
Келді дала күйіне.
Өзің өрттен сақтаған,
Өзіңе ыстық дүние.
5
Соғыс бір сұмдық өрт,
Тас жанды, жер күйіп.
Кек топан —құдірет,
Өшірді сел құйып.
Солдат тұр шинельді
Арқалап жетімді.
Келешек күндерді
Көтерген секілді.
* * *
Шытымыр аяз шырқын ап,
Бұйығып қатқан мұз дала.
Бу болып демі бұрқырап,
Су алып қайтты қыз бала.
Аспанды жапты қайта бұлт,
Бұрқырап боран келе ме?
Қос шелек қолда шайқалып,
Әрең деп шықты төбеге.
Жаутаңдап қарап жолына,
Жайылып жатыр қой ықта.
Қос шелек алып қолына,
Барады-ау тағы ойыққа.
Асылып әке мойнына
Жүретін кезі еркелеп.
Еркіне соғыс қойды ма,
Есігін қағып ентелеп.
Сол ойлар түнде ұрланып,
Түске енді қыстың бұлтындай.
Ұйтқыды боран жынданып
Ысқырық тартып бір тынбай.
Жүніндей қаздың түтіліп,
Бұрқырап жатты қар ұшып.
Әкесі жүрді түтігіп,
Майданда жаумен алысып.
Талықсып таңның кезінде
Ышқынып боран қашты аулақ.
Мөлтілдеп жасы көзінде
Селкілдеп басы қақшаңдап.
Аспанда бұлттар жөңкіліп,
Боран мен соғыс бір қашты.
Дүниеге жаңа өң кіріп,
Күмістей нұрын күн шашты.
Түрлентіп түсін әрлі етіп,
Әркімге айтып қуанып.
Мәз болып түске әндетіп,
Қыз бала қайтты су алып.
Сырбай Мәуленов, Сырбай Мауленов, Әскери әсерлер, Аскери асерлер сөзі, 0
Біздің ұялы қосымшаларды жүктеңіздер:
Google Play және App Store






GM

Сөзін қосқан

26.08.2016